Хөргөгч, хөлдөөгч нь айл өрхийн хамгийн тасралтгүй ажилладаг цахилгаан хэрэгсэл юм. Тиймээс зөв ашиглаж, тогтмол арчилснаар цахилгаан зарцуулалтыг бууруулж, хүнсний бүтээгдэхүүний чанарыг хадгалан, төхөөрөмжийн ашиглалтын хугацааг уртасгах боломжтой.

1.Температурыг зөв тохируулах

Мэргэжилтнүүд хөргөгчний температурыг 3–4°C, хөлдөөгчний температурыг -18°C байлгахыг зөвлөдөг. Энэ нь хүнсийг аюулгүй хадгалах, эрчим хүчний хэрэглээг оновчтой түвшинд байлгахад тусалдаг.

2. Конденсаторын ороомгийг тогтмол цэвэрлэх

Хөргөгчийн ар эсвэл доод хэсэгт байрлах ороомог дээр тоос, үс, хог хуримтлагдсанаар төхөөрөмж илүү их ачаалалтай ажиллаж, цахилгааны хэрэглээ нэмэгддэг.

Ороомгийг 6 сар тутамд нэг удаа, тоосжилт ихтэй орчинд эсвэл гэрийн тэжээвэр амьтантай бол илүү ойр давтамжтай цэвэрлээрэй.

Цэвэрлэх алхам:

• Цахилгаанаас салгах
• Ороомгийг тоос сорогч эсвэл зөөлөн сойзоор цэвэрлэх
• Үлдэгдэл тоосыг арчих хатаагаад
• Буцаан залгах

3. Хаалгыг удаан хугацаагаар онгорхой орхихгүй байх

Хаалга онгойх бүрт гаднах дулаан агаар дотогш орж, компрессор илүү их ажиллах шаардлагатай болдог. Тиймээс хэрэгтэй зүйлээ урьдчилан төлөвлөж авч, хаалгыг аль болох богино хугацаанд онгорхой байлгаарай.

4. Хэт дүүргэж эсвэл хэт хоосон байлгахгүй байх

Хөргөгч, хөлдөөгч нь агаарыг чөлөөтэй эргэлдүүлэх зайтай байх үед хамгийн үр ашигтай ажилладаг. Хэт дүүргэж ч болохгүй, хэт хоосон байлгаж ч болохгүй. Хөргөгч, хөлдөөгчөө 75% орчим дүүрэн байлгах нь хөргөлтийн үр ашгийг нэмэгдүүлж, цахилгааны хэрэглээг бууруулдаг.

5. Хаалганы жийргийг шалгах

Жийрэг муудсан тохиолдолд хүйтэн агаар алдагдаж, хөргөгч тасралтгүй ажиллах эрсдэлтэй. Шалгах энгийн арга: Цаас хавчуулж хаалгаа хаана. Цаас амархан сугарч байвал жийргийг шалгаж, шаардлагатай бол солих хэрэгтэй.

6. Мөс ихээр хуралдуулахгүй байх

Хөлдөөгчид мөс ихээр үүсвэл хөргөх ажиллагаа муудаж, цахилгаан зарцуулалт нэмэгддэг. Мөсний зузаан нэмэгдэх үед гэсгээж цэвэрлэж байх нь зүйтэй.

7. Халуун хоол шууд хийхгүй байх

Шинэхэн чанасан халуун хоолыг шууд хөргөгчинд хийх нь дотор температурыг өсгөж, компрессорт нэмэлт ачаалал өгдөг. Хоолыг өрөөний температур хүртэл хөргөөд хөргөгчинд хадгалаарай.

Шинэлэг технологи, дээд зэргийн чанар, загварлаг дизайн бүхий хөргөгч, хөлдөөгчийн өргөн сонголтыг https://next.mn/mn/s/kitchen/refrigerator-ээс сонгоорой. Хүнсний бүтээгдэхүүнээ илүү удаан шинээр нь хадгалж, гал тогооны орчноо шинэ түвшинд хүргээрэй.